Shil Dad ku Dhinteen oo ka Dhacay Gellinsoor.

Jan,28.2005 Radio Free Somalia (RFS)

Hal qof ayaa ku geeriyooday duleedka degmada Gellinsoor ee gobolka Galgaduud ka dib markii maleeshiyooyin hubaysani ay waddada u galeen gaari dad rakaab ahi saarnaayeen oo ka yimid dhinaca magaalada Gaalkacyo ee gobolka Mudug.

Ninka dhintay oo ka mid ahaa rakaaabka gaarigaasi,ayaa waxaa la sheegayaa in ay haleeshay rasaas ay rideen maleeshiyooyinka jid galka sameeyay oo gaariga rasaas oodda kaga qaaday ka dib markii wadaha gaarigu ka dhaga adaygay amar kaga yimid dhinaca dablayda oo ahaa in uu gaariga istaajiyo.

Toddobaadkii hore ayay ahayd markii 2 qof ay ku dhinten 3 kalena ay ku dhaawacmeen iska hor imaad dhex maray labo kooxood oo mid ka mid ah waddada jidgooyo dhigatay,iyo maleeshiyooyin kale oo ilaalinayay gawaari xamuul oo ka yimid dhinaca Gaalkacyo kuna sii jeeday magaalada Baladwayne ee xarunta gobolka Hiiraan.

Tan iyo markii dagaallada beeleed ay gobollada Mudug iyo Galgaduud ku dhex mareen labada beelood ee Saleemaan iyo Sacad,waxaa soo badanayay maleeshiyooyinka aan cidna ka amar qaadan ee jid gooyada dhigta waddada dheer ee isku xirta gobolka Hiiraan ilaa Mudug,iyadoo maleeshiyooyinku ay dalbadaan in ay iyagu jidka gudbiyaan gawaarida xamuulka ah ee Muqdisho ka baxaysa haddii ay sidaasi diidaanna waddada u gala.

Tuulada lagu magacaabo Beendheere oo ku dhow Gellinsoor ayaa halka ugu daran ee ay ku sugan yihiin maleeshiyooyin jidgooyo u taallo oo u jeeddada joogitaankooduna uu yahay in ay diyaar u ahaadaan dagaal mar kale dhex mara labaldii beelood ee diriray oo aan wali xurguftoodii xal waara loo helin.

Odayaasha iyo waxgaradka deegaannada ay maleeshiyaadku qalalaashaha ka wadaan ayaan ku guulaysan in ay arrintaasi isku howlaan,waayo waxay dadaalkooda oo dhan isugu geeyeen sidii ay u qaboojin lahaayeen xiisadda beelaha walaalaha ah ka dhex taagay oo ay rumaysanyihiin haddii iyada xal loo helo in wax walba ay hagaagayaan.

Liibaan Cabdi Cali