Gudoomiya Baarlamaanka iyo Wafdigiisa oo Booqday Xaruntii Madaxtooyada Soomaliya

Feb,8.2005 Radio Free Somali (RFS)

Wafdigii uu horkacayay guddoomiyaha baarlamaanka dowladda federaalka kmg ah ee somalia Shariif Xasan sheekh aadan ayaa maanta booqasho ku tagay xaruntii hore ee madaxtooyada somalia ee magaalada Muqdisho.

Waxaa wafdiga Shariifka si aad ah u soo dhaweeyay taageerayaasha isbahaysiga USC/SNA garabka uu hogaamiyo Xuseen Maxamed Caydiid oo wasiirka arrimaha gudaha ka ah dowladda cusub ee C/laahi Yuusuf madaxwaynaha ka yahay.

Guddoomiyaha Baarlamaanka Shariif Xasan ayaa isna ka mahad celiyay sida wanaagsan ee loo soo dhaweeyay isagoo sheegay in uu aad ugu faraxsanyahay in ay dib ugu soo laabtaan madaxtooyadii Soomaaliya ka dib 14 san oo dalku dowlad la'aan ahaa.

Abuukar Cusmaan Ganay oo ah ku simaha Xuseen Caydiid oo wafdiga dowladda soo dhaweeyay ayaa sheegay isaguna in ay ku faraxsanyihiin in ay madaxtooyadii Soomalia muddadii burburka daryeeleen haddana u soo socoto dowlad Soomaalilyeed oo uu sheegay marka ay dalka soo cagadhigato in ay ku wareejin doonaan.

Shariif Xasan Sheekh Aadan iyo wafdigiisu ma ahan kuwii ugu horreeyay ee booqda Villa Somalia laakiin wafdigi arbacadii ina dhaaftay dalka yimid ee guddoomiye ku xigeenka labaad ee Baarlamaanka Cusmaan Boqorre hor kacayay ayaa iyaguna sidoo kale booqday xarunta madxtooyada oo si wanaagsanna loogu soo dhaweeyay.

Liibaan Cabdi Cali
hayaan_8@hotmail.com