Muuqaalo Ka mid ah Muqdisho

Muuqaalka Muqdisho (Qebta 3aad)

Dagaalladii sokeeye markii ay dhaceen wax kasta oo dhisnaa waa burburriyeen, si fududna waxaa u dumay wax kasta , haddey dhismooyin ahaan lahaayeen iyo akhlaaqdii banii’aadamka , waayo intii awoodi kartay iney qaxaan wey qaxeen , intii qixi weysana waxaa jibaaxay dhaqamadii cusbaa ee ay dadkii soo duulay ay wateen, in kasta oo ay haraaga magaalada ku harey ay is adkeeyeen , dabeecadahoodiina xafiteen waxay la mid noqdeen dad yar oo ka duwan inta badan oo kuwa magaalada soo galay ay u heystaan dad lamid ah faraacinadii hore oo dhaqamadoodii laga soo tagey.

Hadii aan ku hor maro dhinaca dhaqamada iyo isbeddelka ku yimid tan iyo intii ay dhaceen dagaalladii sokeeye magaalada muqdisho dadka soo galay waxay aad uga fog yihiin ku dhaqanka akhlaaqda suuban iyo in ay u hoggaansanaadaan nooc kasta oo sharci ah.

Dagaallada ka hor qof kasta oo magaalada ku nool marka laga reebo in yar oo fara ku tiris ah wuxuu ku dhaqmi jiray aadaab guud oo magalada ka jirtay haddey ahaan laheyn u hoggaansanaanta sharciga , haddey ahaan laheyd in uu isagu isxilqaamo, haddey ahaan laheyd in uu iska ilaaliyo xumaha ay diinta ka reebeyso IWM, waxaadna arki jirtay marka ay dadku isaga hor yimaadaan arrimaha qaarkood in la oran jiray war sidaas ha la yeelo , war arrintu sidaas ma aha IWM, dabadeedna lagu kala bixi jiray is qancis iyo wax is tusaaleyn.

Tusaale ahaan marka ay laba qof arrin isku qabato, waa la garransiin jiray iyadoo weliba haddii loo baahdo markaatida wax laga weydiin jiray sida ay wax u dhaceen, doodo aqligal ah keddibna gar ayaa bixi jirtay , dabadeedna waa leys qancin jiray , waana la kala tegi jiray.

Maanta waxyaabaha leysku qabanayo waa wax gardarro cad ah oo aan u baahneyn markaati iyo dood is qancin ah , waa lagu dulminayaa, keddibna xoog ayaa wax lagaaga fushanayaa, mana jirto cid kaa dhageysaneysa garran iyo maangal, waxaad mooddaa dadka qoryaha wata iney mar kasta iyagu garta leeyihiin oo ay u xukuman tahay mar haddii uu qori wato uuna leeyahay qabiil uu salka la galo.

Tusaale ahaan, goobaha ganacsiga ayaa waxaa imaanayo nin debley ah oo qori wato, sida maqaayadaha ama meelaha Qaadka lagu gado, raashin ayuu cunayaa, ama Qaad ayuu qaadanayaa, keedibna markii uu qiimaha loo sheego ayuu iska dhaqaaqayaa, marka la weydiiyo lacagta lagu leeyahay wuxuu ku jawaabayaa ma heysto, keddibna buuq ayuu dhalinayaa, handadaad ayaa ku xigsaneysa, keddibna haddii aadan ka aamusin rasaas ayaa lagula dhacayaa, ama dhimasho ama dhaawac, nasiibkaa hadba waa sidii aad noqoto.

Dhacdooyinkaas oo kale iyo kuwo la mid ah waa kuwa maalin kasta lagu arko magaalada muqdisho, xeerka ka dhashay arrinkaasna waa , haddii aad tahay qafka ganacsadaha ah mid ka dhashay qabiil hubeysan oo lagu yaqaan goobtaada ganacsigana looga jeedo hub yaalla wey culus tahay in laguugu soo degdego, mar marse waxaa dhacda in debley aan kala aqoon dadka ganacsatada ah ay halkaas tagaan ayna ku sirmaan gardarrana ay sameeyaan dabadeedna isku dhac halkaas ka dhasho , qofkii laga badiyaba.

Laakiin haddii aad tahay qof aan hubeysneyn, goobtiisa ganacsina hub iyo waardiyo looga jeedin markaas

waxaad tahay hilib geed saaran qofkii ku soo gaaro ayaa ku boobaya.

Magaalada wax is xil dhowr ah kama jiraan, qof weyn lama xormeeyo, qof yar lama dhowro , waxaad arkeysaa haween gaboobey oo waalan oo waddooyinka iska dhex marmaraayo oo lagu leeyahay haweeneydaas xalay ayaa la xoogay oo ay kufsadeen koox dhallinyaro ah!, culamaa'u diinkii doorkii aan ku niqiin lahaan jiray lama xushmeeyo lamana dhageysto , waa lagu jees jeesaa waxaana lagu tiriyaa suufiyaal gabooby oo laga baxay waxa ay aaminsan yihiin.

Marka la eego dhinaca gaadiidka dadweynaha , isbeddel ayaa ku yimid sidii lagu aqoon jiray sida ay u shaqeeyaan, waxaa soo baxay darawaliin nooc cusub ah oo aaney jirin wax ay ka yaqaaniin sharciga waddooyinka mar haddii aaney jirin cid xakameysa ama fasax siineysa Darawaliinta cusub, taraafikana aysan jirin, haddii uu shilgalana aaney joogin cid tallaabo ka qaadeysa, waxaad arkeysaa darawal kasta sidii uu doono inuu gaarigiisa u wadanaayo wax uu u aabo yeelaayana aaney jirin xitaa naftiisa! waayo waxaad arkeysaa darawalku markuu gaariga wadayo inuusan garaneyn in waddada lala leeyahay shilna uu geli karo, taasina waxaa laga dhaxley in darawaliin iyo dad kaleba shilal ku dhintaan, ma jirto marka waddada ciriiri noqoto cid isku samreysa ama yeelan karta dulqaad yar, darawal kasta wuxuu rabaa inuu isaga markahore uu dhaqaaqo, taasina ay ka dhalato in waddadu xirnaato saacado dheer, nin kastaana uu gaarigiisa densado leysna horfadhiyo ilaa ay debleyda gawaarida qaarkood la socota ay rasaas furto ama ay is xabbadeeyaan , halkaasna markaa lagu kala cararo oo ay waddadu sidaas u furanto.

Intaas oo kaliya ma aha dhibaatooyinka ka dhashay dabeecadaha laga tegay iyo sida ay u dhaqmaan dadka Muqdisho ku badan ee wey fara badan yihiin, todobaadka soo socda ayaana ku soo qaadan doonaa, muuqaalkale oo ka mid ah magaalada Muqdisho haddii eebbe idmo

Aweis Husein Shiino Muqdisho (RFS)

nabiil19@yahoo.com