Muuqaalo Ka mid ah Muqdisho

Muuqaalka Muqdisho (Qebta 6aad)

Saameynta ay ku yeesheen Muqdisho qaar ka mid ah dagaallada ka soo cusboonaadey koonfurta Soomaliya.

Dagaallada ka soo cusboonaadey qaar ka mid ah gobollada Koonfureed ee Somaliya ayaa cabsi weyn ku soo kordhiyay shacabka Somaaliyeed iyadoo ay horeyba dalka ay uga jireen ammaan darro iyo xasillooni la'aan taasoo ciriiri gelisay habsami u socodka Noloshii caadiga aheyd ee dalka ka jirtay.

Shacabka Somaliya oo muddo afar iyo toban sano aheyd ku soo jirey dagaallo sokeeye oo aan xad laheyn iyadoo ay intaas u sii wehliyeen abaaro, cudurro iyo gaajo ayey haddana dagaallo hor leh ka sii dhex qarxeen xilli la rejeynayey in Dowllad loo dhan yahay lagu soo dhiso Nairobi.

Dagaalladaan soo cusboonaadey ayaa qaarkood ay u dhaxeeyaan jufooyin walaalo ah oo si aad iyo aad ah isugu dhawaa laguna tirinayey kuwa ugu deggan beelaha ay ka tirsan yihiin uguna reer magaalsanaa, hal meelna isla degganaa haddey miyyi ahaan laheyd amaba magaalo gaar ahaan magaala madaxada Somaliya ee Muqdisho.

Dagaalladan hadda ka soo cusboonaadey Koonfurta Somaliya ayaa qaarkood waxay ka bilowdeen is afgaransho waa dhex marey meleeshiyo beeleed ku nool miyiga kaasoo isku beddelay gacan ka hadal iyo in dad leyska dilo, dabadeedna dagaalladii ay u soo tallaabaan magaala Muqdisho ayna bilowdaan in ay is ugaarsadaan labadii jufo ee colaadda u dhaxeysay.

Is ugaarsigaas ka bilowdey Muqdisho wuxuu khalkhal geliyay degganaashihii yaraa ee ka jiray magaalada keddib markii la dilay nin ganacsade ahaa ee Makhaayad ku lahaa ka soo horjeedka Ajibta Beyxaani ee Xaafadda Shibis, dilka ninkaasna waxaa la xiriiray in jufadii uu ka dhashay ay iyagana ugaarsi bilaabaan, dagaalladiina ay u sii tallaabaan agagaarka Tixsiile iyo Warmaxan , halkaas oo ay jiraan dad xoolo dhaqato ah oo ka tirsan labada jufo ee dagaalku u dhaxeeyo, halkaasna dagaallo ka dhacaan dhowr qofna lagu dilay.

Dhanka kale magaalada Muqdisho waxaa ku soo kordhay xasilooni darro iyo cabsi dad weynuhu ka qabaan in lagu kahdoomo oo si qalad ah loo dilo , waayo jufooyinka dirirtu ka dhaxeyso waxaa dhex deggan dad kale oo ka heyb duwan balse aan la kala garaneynin isku dhex jurkooda.

Waxaa kale ee la xiriiray is ugaarsiga jufooyinkaan in waddooyinka qaarkood cabsi gaar ah ka jirto sida waddada Wadnaha gaar ahaan isgoyska Siinay oo ay ku badan yihiin meleeshiyooyinka mid ka mid ah jufooyinka dagaalladu u dhaxeeyaan, taasoo sababtay in suuqii Siinaay iyo Rugihii Caafimaad ee ugu weynaa Magaalada ay howlahoodii hoos u dhac ku yimaad keddib markii ay dadkii imaanayey goobahaas ay yaraadeen cabsi awgeed.

Dhanka kale waxaa dhuumaaleysi iyo is ilaalin adag is geliyay ganacsatada ,aqoonyahannada &darawalyaasha u dhashay labada jufo oo colaaddu ka dhaxeyso , taasoo keentay in howlahoodii ciriirigalaan amaba ay gebi ahaanba joogsadaan, taasoo aad u gilgishay ganacsigii iyo habsami u socodkii nolol maalmeedka magaalada iyo sidii looga bartay.

Ilaa iyo hadda ma cadcadda tallaabooyin la xiriira waan waan la dhex dhigo jufooyinka is colaadinaya waayo , dhowr mar oo ay hore u dagaallameen jufooyinkaan ayaa waxaa soo dhex galay wax garad nooc walba leh iyadoo loo xeeray iney ku dhaqmaan shariicada Islaamka oo ay is qisaasaan markii ay wax iska dilaan, balse jufo ka mid ah labada jufo ayaan u hoggaansamin , taasina waxay ka careysiisay waxgaradkii xeerkaas kala dhex dhigay jufooyinkaas, waxaana muuqata haatan ineysan wax garadkii aysan ku soo degdegeynin kala dhexgalkooda.

La soco talaadada dambe.

Aweis Husein Shiino Muqdisho (RFS)

nabiil19@yahoo.com