Ganacsatada Gobolka Banaadir oo Soo Saaray Baaq ay Dawladda ku Taageerayaan

Feb,10.2005 RadiofreeSomalia (RFS)

Ganacsatada gobolka Banaadir ayaa soo saaray war saxaafadeed ay ku taageerayaan dowladda ayna dib soo celinta deganaanta dalka kaga qayb qaadanayaan.

War saxaafadeedka ganacsatada oo nuqul ka mid ah la soo gaarsiiyay Radiofreesomalia:ayaa u qornaa sidatan :

Ganacsatada gobolka Banaadir waxay soo dhawaynayaan,wafdiga ka socda baarlamaanka iyo xukuumadda soomaaliyeed ee uu hoggaaminayo guddoomiyaha baarlamaanka Mudane Shariif Xasan Shiikh Aadan ee soo gaaray Muqdisho.

Ganacsatadu waxay guddoomiyaha,guddoomiye ku xigeenka,xubnaha baarlamaanka iyo xukuumaddaba ku bogaadinayaan booqashada hor dhaca ah oo ay ku yimaaddeen dalka,taas oo bilow fiican iyo dhiirri galinba u noqonaysa hanaanka dowladda cusub ee soomaaliyeed ay ku imanayso ugana howl galayso dalka gudihiisa.

Ganacsatadu shirkii ay la yeesheen wafdiga ka dib waxay magacaabeen guddi gaar ah oo ka soo baaraandaga arrimihii laga wada hadlay,guddigaasi waxay isugu yimaadeen dhowr shir oo ay uga wada hadleen,kaalinta ganacsatadu ka qaadan karto marxalladda xasaasiga iyo taariikhigaba ah ee dalkeennu marayo.

Gunaanadkii shirkaasi waxaa la isku raacay in ganacsatada gobolka Banaadir ay si buuxda u taageeraan dowladda soomaaliya u dhalatay,si loo sahlo imaatinkeeda dalka iyo hanashada xilkeeda,waxaa si gaar ah hoosta looga xarriiqay qodobbadan soo socda:

1- In dowladda soomaaliyeed lagu soo dhaweeyo dalka iyo magaalo madaxdaba,loona diyaariyo tashiilaadka ay u baahantahay.

2- In ganacsatadu dowladda gacan buuxda ku siiso dhammaystirka dib-u hesheesiinta iyo sugidda nabad galyada.

3- In dowladda lagala shaqeeyo barnaamijyada hub ka dhigista iyo dhaqan celinta maleeshiyooyinka hubaysan.

4- In dowladda lagala shaqeeyo hir galinta barnaamijka canshuuraha.

5- In ay ganacsatadu kaalin Muuqata ka qaadato dib u dhiska dalka gaar ahaan soo celinta deegyada bulshada iyo kaabayaasha dhaqaalaha.

6- Ganacsatadu waxay ayidayaan in dib loo dhiso ciidanka qaranka soomaaliyeed, si uu u hanto sugidda nabad galyada dalka iyo ururinta hubka,haddiise laga maarmi waayo in la kaashado ciidammo shisheeye waa in aysan ka imaan dalalka safka hore iyadoo la xurmaynayo xeerarka caalamiga ah lana tix galinaayo duruufaha gaarka ah ee gobolka ka jira.

Si loo xaqiijiyo iskaashi iyo wada shaqayn wanaagsan,oo ka dhaxaysa dowladda iyo ganacsatada waxaa lagama maarmaan ah in la helo guddi labada dhinac ah oo howlaha kor ku xusan ka wada shaqeeya.

Ugu dambayntii ganacsatadu waxay diyaar u yihiin gudashada waajibka ka saaran in dalka lagu soo dabbaalo dowladnimo asaas u noqota soo noolaynta qaranka soomaaliyeed,soo celinta sharciga iyo kala dambaynta,sugidda nabadgalyada iyo xasilloonida, dib u dhiska dalka iyo horu marinta nolosha shacabka.

Danta guud ka sokow arrimahaasi oo dhami waa kuwo u adeegaya danta ganacsatada waayo waxay asaas u yihiin horumarinta ganacsiga dhan walbaba.Ganacsatada gobolka Banaadir iyagoo xiriir iyo wada tashi la sameeyay xubnohooda muhiimka ah ee aan hadda dalka ku sugnayn waxay guddoonsadeen in ay u howl galaan sidii dowladdu uga hir gali lahayd dalka oo dhan gaar ahaan
magaalo madaxda.

Bayaankaasi ganacsatadu soo saareen,waxaa ku saxiixnaa guddoomiyaha ganacsatada gobolka Banaadir Maxamuud C/kariim Cali Gabayre.

Liibaan Cabdi Cali
hayaan_8@hotmail.com.

Muqaalka Som   Horn Afrik   STN