Gen.Moorgan iyo Ciidankiisu ay soo gaareen Tuullada Xagar ee Jubbada hoose, halkaad uu horey uga talin jiray.

Sept,7.2004 Radio Free Somali (Xagar)

Wararka ka imaanaya Kismaayo ayaa sheegaya in ay beryahaan ay ka jirtay magaalada Kismaayo cabsi wayn oo dhanka ammaanka ah keddib markii la sheegay in Gen.Maxamed Siciid Xirsi (Moorgan) uu weerar hubaysan ku soo qaadayo magaaladaasi uu horay uga talin jiray.

Magaalada Kismaayo ayaa haatan si wayn uga qaxayaan dadkii ku dhaqnaa ,iyagoo ka cabsi qaba dagaal ka dhaca gudaha magaalada,Sidoo kale waxaa jira warar sheegaya in ay dhinac socoto qaxaas bililiqo loo gaysanayo dadka ganacsatada ah.

Dhanka kale wararka na soo gaaraya ayaa sheegaya in Gen.Moorgan iyo Ciidankiisu ay soo gaareen Tuullada Xagar ee Jubbada hoose

Gen.Moorgan iyo Ciidankiisa ayaa lagu waramayaa in ay wataan baabuur tiro badan oo u badan kuwa dagaalka ee ay saaranyihiin qoryaha lidka diyaaradaha kuwaasoo gaaraya ilaa 60 baabuur oo Tekniko ah.

Gen.Moorgan ayaa ku celceliyay in uusan wax weerer ah ku qaadayn Jubbooyinka gaar ahaan magaalada Kismaayo,inkastoo maamulka Dooxada Jubba ee haatan gacanta kuhaya magaaladaasi ay sheegeen in ay iska caabin doonaan waxa ay ugu yeereen weerarka garada ah ee uu waddo Gen.Moorgan.

Aweis Xuseen Shiino (RFS)

Xafiiska Muqdisho

nabiil19@yahoo.com