|  
SHIRKII KENYA: Shirqool Cabdullahi Yusuf Loogala Wareegay Taladii
Puntland!.
Feb,2.2005 Radio Free Somali (RFS)
Mudane Cabdullahi Yusuf Axmed oo horay u ahaa Madaxweynihii
Maamul Goboleedka Puntland ayaa dhawaan shirkii Kenya loogu caleemo
saaray Madaxweynaha Jamhuuriyada Federaalka ee Soomaaliya. Waa xil
ka weyn kana muhiimsan kii uu horay u hayay waxaana uu la maamuus
noqday madaxweynayaasha kale ee aduunka. Waxaa dareenkiisa kiciyay
21 dii madfac ee loogu riday barxad lagu ciyaaro kubada cagta ee ku
taal Nairibi maalinkii la dhaariyay.
Ilaa iyo hada wadamo dhowr ah oo uu booqday waxaana garoomada diyaaradaha
loogu gogley katiifad gaduudan (red carpet) oo madaxweynayaasha lagu
istaajiyo marka loo garaacayo muusikada salaan sharafta. Arimahaas
oo dhani waxa ay u muuqdaan kuwo raali gelinaya madaxweynaha oo halgan
dheer u soo maray in uu ku fariisto kursigii looga ariminlahaa Soomaaliya.
Caqabadaha hortaagan madaxweynaha :-
Iyadoo ay jirto guushaa uu gaaray madaxweynuhu ayaa hadana waxaa la
orankaraa waxaa ku soo siyaaday dhibaato hor leh. Weli ma aanu booqan
dalka uu madaxweynaha u yahay mana muuqato astaamo muujinaya in ay
xitaa arintaasi u sahlantahay inkasta oo ay maalmahan soo baxayaan
warar sheegaya in uu mudo 2 saac ah ku hakan doono waqooyiga degmada
gaalkacyo oo ah halkii uu ku dhashay.
Caasimada Muqdisho oo uu tegitaankeedu shuruud adag u yahay aqoonsi
ay dowladiisu ka hesho caalamka iyo soomaalida inteeda badan ayuu
isagu ka qaatay go'aan adag oo ah in aanu tagin ilaa iyo inta ay dhamaan
malayshiyooyinka joogaa hubkooda, xarumaha dowlada, garoomada iyo
dekedaha ku wareejinayaan ciidamo shisheeye oo uu horay uga dalbaday
wadamada Afrika taasi oo dadka ku xeel dheer arimaha soomaaliya ay
u arkaan wax aan loo fadhin.
" Ninkii buunka xadayoow xagee ku yeerin doontaa". Madaxweynaha
waxaa hortaal su'aal culus oo ay Soomaalida iyo aduunyada kaleba weydiinayaan.
Goorma ayaad soomaaliya ku laabanaysaa oo aad caasimada Muqdisho tagaysaa?.
Madaxweynuha uma muuqato sansaan uu su'aashaa uga jawaabi doono mustaqbalka
dhow.
Shirqool siyaasadeed oo loo maleegay Cabdullahi yuusuf :-
Cabdullahi Yuusuf oo taariikh ahaan ka soo horjeesan jray dawlad kasta
oo Soomaaliya laga dhiso ayaa shirka Kenya ka hor wuxuu ku jiray nolol
iska qabow oo uu ku haystay madaxtinimada Puntland isaga oo wixii
maamulkiisa soo farageliyana qoriga iskaga xalin jiray. Maanta kursigiisi
Puntalad waxaa ku dekeynaya Gen. Cade Muse Xirsi oo uu waqti aan sidaa
u fogayn Cabdullahi xabad kaga saaray xuduudaha Puntland. Si sahlan
ayay mucaaradkiisi ula wareegeen jagadiisi isagiina waxaa la huwiyay
madaxweynanimo aan dhaafsiisnayn in afka laga sheego oo aan la mala'awaali
karin inta ay magac ahaan u sii jiri karto.
Dadka badankiisa ayaa waxaa mucjiso ku noqotay sida fudud ee uu Cabdullahi
Yuusuf oo safka danbe uga jiray liiska musharixiintu uu ugu guuleystay
aqlibiyad aad u saraysa. Warar lagu kalsoonaan karo oo soo baxay doorashada
madaxweynaha ka bacdi ayaa tilmaamaya in siyaasiyiin ka soo jeeda
beelo kala duwan oo doonayay in ay Cabdullahi ka saaraan masraxa siyaasada
ee soomaaliya iyo taageerayaasha Cade Muuse oo iskaashaday in ay maalgeliyeen
ololihii doorashada ee Cabdullahi si loogu helo madaxtinimo maqaar
saar ah oo looga dhigo dibad joog.
Ujeedo kastaba ha laga lahaadee, waxaa ay dad badani u arkaan in doorashada
Cabdullahi Yuusuf sii dheeraynayso dowlad la'aantii iyo jahwareerkii
siyaasadeed ee Soomaaliya oo hada 15 sano jirsaday.
Abdirizaq
Haji Ahmed
Minnesota,
USA
E mail abdirizaq88@hotmail.com
Opinions
expressed in this columns are those of the authors and not necessarily
those of Radio Free Somalia
Qoraaladu waxay ka turjumayaan aragtida Qoraaga mana loo fasiran karo
tan Radio Free Somalia
|
Muqaalka
Som 
